Akshon temporal pa entregá arma di kandela sin konsekuensia na Boneiru

Orden Públiko i Seguridat

Akshon temporal pa entregá arma di kandela sin konsekuensia na Boneiru

Pa AC 24 Mar, 2026 5 Min Lesa 22 Bishitante

Kuerpo Polisial Hulanda Karibense (KPCN) i Ministerio Públiko BES a kuminsá un akshon temporal na Boneiru pa entregá arma di kandela sin konsekuensia penal. Ku e inisiativa aki, habitantenan tin e oportunidat pa deshasí di arma ilegal de manera boluntario, komo parti di un aserkamentu konhunto pa redusí poseshon ilegal i oumentá seguridat den komunidat.

E akshon ta tuma lugá for di djaluna 23 di mart te ku djabièrnè 3 di aprel, tur dia entre 2:00 di atardi i 8:00 di anochi. Entrega por tuma lugá na e anterior kazèrne di VKB na Bulevar Gobernador N. Debrot.

Segun polis i Ministerio Públiko, partisipante no tin mester di identifiká nan mes. No ta pidí nòmber ni dokumento di identifikashon, i no ta registrá datonan personal. Tampoko no tin konsekuensia penal pa esnan ku entregá un arma den e periodo aki. Meta di e akshon ta pa kita armanan for di sirkulashon na un manera sigur, sin importá kon e arma a yega den man di un persona.

Outoridatnan ta pidi pa tur hende ku kier entregá un arma sigui medidanan di seguridat. E arma mester ta deskargá, munishon separá, i hinka den un tas, saku òf kaha firme. Tambe ta importante pa no mustra e arma den públiko i bai direktamente na e sitio di entrega.

Pa esnan ku tin duda tokante transporte di un arma, polis ta rekomendá pa tuma kontakto via 715 8000 pa koordiná asistensia.

KPCN i Ministerio Públiko BES ta hasi un yamada na komunidat pa probechá di e oportunidat aki. Segun nan, un arma di kandela den kas ta forma un riesgo pa e doño, besindario i pa e isla en general.

Despues di 3 di aprel, e areglo lo terminá i autoridatnan lo intensifiká kòntròlnan i akshonnan kontra poseshon ilegal di arma di kandela. “Seguridat ta un responsabilidat komun,” segun e instansianan. “Esaki ta e momentu pa tuma un desishon konsiente i kontribuí na un Boneiru mas seif.”