Papiamentu
Polis a detené un hòmber di 36 aña di edat djasabra anochi, 31 di òktober, den Hanchi Amboina, bou di sospecha di manehá bou di influensia di alkohòl. E detenshon a tuma lugá alrededor di 11.10 or di anochi, despues ku polis a detektá un vehíkulo sin lus di patras riba Kaya Nikiboko Nort. E outo a haña señal pa para na Hanchi Amboina pa un kòntròl.
Durante e kòntròl, polis a nota un holó fuerte di alkohòl i a deskubrí bòternan di alkohòl den e vehíkulo. E shofùr a pasa un tèst di supla, ku a indiká ku el a konsumí mas alkohòl ku ta pèrmití segun lei. E hòmber, ku inisial C.A.C.B., a keda detené i transportá pa warda di polis pa un análisis di rosea. Ademas, polis a konfiská su reibeweis. E sospechoso lo haña un prosèsferbal pa e infrakshon.
Kòntròl di tráfiko riba Kaya Neerlandia
Mas trempan e mesun anochi, polis a realisá un kòntròl planiá di tráfiko riba Kaya Neerlandia.
Durante e akshon, a para i kontrolá un total di 15 vehíkulo, entre nan outo i skuter. Komo resultado di e kòntròl, kuater shofùr a risibí but pa manehá sin reibeweis bálido i sin seguro bálido.
Segun polis, kòntròlnan di tráfiko lo sigui tuma lugá komo parti di e esfuerso pa garantisá seguridat riba kaya.
Kargando komentarionan...