Outoridatnan lo reanudá búskeda mainta 13 di yüni, di Milton Frans, mihó konosí den mundu musikal lokal komo Sanuchii, kende a desaparesé den awanan di Sorobon/Lac Cai djabièrnè 12 di yüni.

Segun informashon di Polis, alrededor di 3:20 pm Meldkamer Sentral a risibí un notifikashon tokante un hòmber ku a disparsé den bahia despues di drenta laman huntu ku dos otro persona. E trio tabata den área te na ora ku nan a enfrentá korientenan fuerte.

Segun informashon ku a yega na Energia Tv, Frans a indiká na su kompañeronan ku e tabata kansá. Dos di e hòmbernan a logra yega tera sano i salbo, pero posteriormente nan a nota ku Frans no tabata visibel mas den awa.

Milton Frans ta un kantante boneriano konosí bou di su nòmber artístiko Sanuchii. E hòben artista a lansa seis dia pasa e videoclip pa su mas resien produkshon, “Miami”, un kolaborashon ku artista lokal Wiwi. E lansamentu a haña atenshon riba medionan sosial i den komunidat musikal lokal.

Un operashon amplio di búskeda a ser desplegá ku partisipashon di Polis Karibense Hulandes, Koninklijke Marechaussee, STINAPA, CITRO, Wardakosta i boluntarionan. E akshon a inkluí uso di boto, hèlikòpter i avion Dash pa buska den e área.

E búskeda a keda suspendé alrededor di 7:20pm pa motibu di skuridat. Te na e momentu aki, no a logra lokalisá Frans.

Polis ta pidi na kualkier persona ku tin informashon ku por yuda den e búskeda pa tuma kontakto mesora via 911, 715-8000 òf e liña di tep anónimo 9310.

Famianan, amigunan i simpatisantenan di e artista ta sperando ku e operashon di mainta lo trese notisia positivo.

Advertisement