Un enkuesta independiente realisá pa Fundashon Tienda pa Konsumidó a mustra ku e kompetensia entre supermerkadonan na Boneiru a duna resultadonan positivo pa e konsumidó den 2025. Durante dies luna, e fundashon a kompará preis di produktonan básiko mensualmente ku meta pa duna klaridat i guia konsumidónan den nan gastunan diario.

Segun e resultadonan, Caribe Nobo a sali komo e gran ganadó di aña 2025. E supermerkado a logra e promé posishon den sinku luna ku ta mart, mei, yüli, ougùstùs i sèptèmber, mustrando konsistensia den preis pagabel. Konsumidónan ku a hasi uso di e lista básiko i a skohe Caribe Nobo durante e periodonan aki, por a logra un sparmentu total di mas di 500 dòler riba nan gastunan.

Bondigro, pa su banda, a distinguí su mes den e último parti di aña. E supermerkado a okupá e promé lugá den kuater luna ku ta, aprel, òktober, novèmber i desèmber, i a mustra su presensia fuerte spesialmente den e temporada di fiesta, ora gastunan di famia normalmente ta subi. E prestashon aki ta indiká ku Bondigro a logra mantené preis kompetitivo den un periodo krusial pa konsumidónan.

Un otro desaroyo interesante tabata e aparishon di Warehouse, ku a logra e promé puesto na luna di yüni. Aunke su presensia na e kabes di ranking tabata limitá, e resultado ta mustra ku tin espasio pa mas kompetensia den merkado lokal.

Fundashon Tienda pa Konsumidó ta indiká ku e sifranan ta mustra kla ku konsumidónan ku ta sigui e komparashonnan mensual i hasi eskohonan konsiente, por realisá un sparmentu signifikante riba nan presupuesto anual. Den un momento ku kosto di bida ta subi mundial mente, informashon manera esaki ta bira kada biaha mas importante pa famianan.

Fundashon Tienda pa Konsumidó tambe a ekspresá apresio pa e supermerkadonan ku ta kontribuí na tene preisnan abou, señalando ku esaki ta benefisiá komunidat direktamente.

E mensahe pa konsumidónan ta kla: sigui informá, kompará preis i hasi eskohonan konsiente, paso esaki por tin un impakto direkto riba e gastunan di bida na Boneiru.

Advertisement