Den Tweede Kamer a tuma lugá un debate riba futuro gobernashon di Boneiru, Sint Eustatius i Saba. E diskushon a tuma lugá durante reunion di komishon fiho pa Relashonnan di Reino riba 1 di yüni 2026 ku Sekretario di Estado Van der Burg. E reunion tabata tokante proyekto di lei pa kambia Wet Openbare Lichamen Bonaire, Sint Eustatius en Saba (WolBES) pa oumentá kantidat di miembronan di Konseho Insular i diputadonan.

E proyekto di lei ta trese un ekspanshon di kantidat di miembronan di Konseho Insular i diputadonan na islanan BES. E medida ta parti di un pakete mas amplio di kambio pa Caribisch Nederland, ku e meta pa fortalesé kapasidat di gobernashon i representashon. E ampliashon di kantidat di miembronan lo wordu implementá den fase. Esaki ta nifiká ku e kambio no lo tuma lugá na un solo momentu, sino stap pa stap.

Durante e debate, parlamentario di PVV, Vlottes a ekspresá kritikanan fuerte riba e plan. El a bisa ku ya pa durante hopi aña no ta mira progreso struktural na e islanan den áreanan importante manera bibienda, siguridat di kuminda i maneho di shushi, apesar di hopi sosten for di Hulanda.

Vlottes a deklará ku polítikonan riba e islanan no tin masha trabou i ku ora situashon bira difísil, semper nan ta pidi Hulanda pa mas plaka. Ademas, el a usa e término “hangmatgedeputeerden” refiriendo na mandatarionan di e islanan. Seguidamente Vlottes a bisa ku úniko kos bon ku e por bisa di e islanan ta ku henter aña tin bon weer.

E palabranan a keda kontestá inmediatamente pa otro miembronan di Parlamento. Diputadonan di D66 i GroenLinks-PvdA a bisa ku e komentario tabata ofensivo i faltando rèspèt pa e habitantenan di Bonaire, Sint Eustatius i Saba.

El a referí tambe na e problema duradero rondó Selibon na Boneiru komo ehèmpel di problema di ehekushon di maneho. Segun Vlottes, esaki ta krea e diskushon ku si Reino mester tuma mas responsabilidat. “Pero si esaki pasa,” el a bisa, “e islanan lo perde parti di nan propio poder di desishon.”

Segun Vlottes, mas polítiko no ta solushoná e problemanan fundamental. Den su diskurso el a referí na un frase anterior tokante “pone e islanan riba Marktplaats pa €1”, pero el a añadi ku segun su opinión, “€1 ta demasiado” pa e situashon aktual.

E komentario a kousa reakshon fuerte den e komishon. Parlamentario di ChristenUnie Ceder a pidi klarifikashon di e posishon di PVV i a señala posibel kontradikshon entre e idea di “pone e islanan pa €1 riba Marktplaats” i na mes momentu mas responsabilidat for di Hulanda, i kon e dos kosnan ta korepsonde ku otro.

Vlottes a responde ku e islanan mes a pidi mas responsabilidat di Reino riba tema grandi manera bibienda i siguridat di kuminda. Segun e, esaki ta mustra ku e sistema aktual no ta funshoná bon, pero el a atvertí ku mas poder for di Hulanda ta nifiká ménos autonomia pa e islanan.

PVV a enfatisá ku solamente sosten finansiero, no ta sufisiente pa solushoná problemanan struktural i ku mester tuma desishonnan kla riba responsablidat di Reino Hulandes.

Riba 9 di yüni próksimo, Tweede Kamer lo vota riba e proyekto di lei i e moshonnan ku a keda presentá. 

Advertisement