Energiatv ta ekspresá su profundo mal kontentu i preokupashon tokante falta total di komunikashon ofisial despues di temblor ku a keda sintí na Boneiru ayera 24 di yüni.

Te na momentu di publikashon di e artikulo aki, ningun komunikado ofisial no a yega serka medio di prensa lokal for di KNMI, ni for di Departamento di Komunikashon, ni for di Crisis Team, ni for di Gabinete di Gezaghèber. Organisashonnan internashonal di teremoto ta indiká ku e komunidat afektá mester sigui instrukshonnan di e outoridatnan lokal. Sin embargo, na Boneiru e komunikashon no tabata efektivo, ku solamente dos publikashon riba Facebook. Loke no ta sufisiente pa mantené tur habitantenan ku informashon oportuno, kla i prepará. 

Esaki no ta manera ku komunikashon di krísis mester keda manehá.

Ora un evento asina ta sosodé, e promé responsabilidat di gobièrnu no ta publiká un mensahe riba medio sosial. E promé responsabilidat ta informá prensa. Medio di komunikashon ta e kanal mas importante pa distribuí informashon rápido, profeshonal i na un manera organisá na komunidat.

Un gobièrnu ku no ta komuniká ku prensa den momentunan di insertidumbre ta pèrdè kòntròl riba informashon ku ta sali pa e pueblo. Enbes di guia e narativa i proveé informashon ofisial, puntual i verifiká, e pueblo ta keda dependé di Facebook, WhatsApp, rumor i spekulashon.

Loke ta hasi e situashon ainda mas preokupante ta ku mesun instansianan aki no tin ningun problema pa komuniká ku prensa durante dia ora tin evento, kampaña, inaugurashon, promoshon òf otro aktividatnan gubernamental. Pa esei, emailnan, komunikado i invitashonnan ta yega regularmente. Pero ora un evento ku por afektá seguridat públiko ta sosodé, e sistema di komunikashon ta parse ku no a funshoná.

Si despues di un temblor ku a keda sintí na Boneiru no tin kapasidat pa manda un komunikado básiko na prensa, e pregunta ku ta lanta awor ta simpel: kiko lo sosodé si mañan tin un kalamidat? Kiko lo pasa si tin un tsunami, un desaster natural mayó òf otro situashon ku ta eksigí komunikashon inmediato ku e pueblo? Awor nos por mira e desaster riba nivel nashonal ku a keda atras na Venezuela. Boneiru tin su instrumentonan prepará? Nos ta referiendo nan un situashon ku por tabata fatal tambe pa Boneiru.

Falta di komunikashon no solamente ta krea frustrashon den medio di prensa. E ta mina konfiansa den preparashon di instansianan ku pueblo ta konta riba dje durante emergensia.

Prensa no ta un enemigo di gobièrnu. Prensa ta un sosio indispensabel den mantené komunidat informá. Ignorá e ròl aki durante un situashon ku ta eksigí informashon rápido no ta solamente un eror stratégiko; e ta un fayo den responsabilidat públiko.

Energiatv ta uni ku otro koleganan den medio di komunikashon ku a ekspresá nan desapunto tokante maneho di informashon. Prensa ta spera un evaluashon serio di loke a pasa i medidanan konkreto pa garantisá ku e mesun fayo den komunikashon no ta ripití den futuro.

Advertisement