Frakshon di UPB den Konseho Insular ta argumentá ku e situashon polítiko aktual na Boneiru a bira instabil despues ku un miembro di koalishon di Partido Demokrat a kita su mes for di e koalishon, loke a laga e gobièrnu komo un gobièrnu di minoria.

Segun UPB, e kambio aki ta pone preshon riba e funshonamentu di e Kolegio Ehekutivo i ta krea duda riba si e gobièrnu tin sufisiente sosten polítiko pa sigui tuma desishonnan importante. E situashon a bira mas grave despues di deklarashon i karta di e diputado di M21. Esakinan a kontribuí mas insertidumbre den e ambiente gubernamental.

UPB indiká ku den un klima polítiko asina, sigui goberná manera “business as usual” no ta responsabel. Nan ta sostené ku desishonnan importante pero no tin e base polítiko sufisiente i por keda poné na diskushon mas despues.

Pa e motibu akí, UPB a hasi un yamada na Gezaghebber pa konsiderápa pone un pousa temporal riba desishonnan di Kolegio Ehekutivo, te ora tin mas klaridat i stabilidat den gobièrnu. Segun UPB, un paso asina lo yuda prevení desishonnan ku por tin konsekuensianan grandi den un momento di insertidumbre polítiko.

Den nan postura, e enfoke prinsipal ta riba garantisá un proseso di gobernashon ku ta transparente i ku tin sufisiente sosten demokrátiko promé ku sigui ku desishonnan di peso.

Na mes momento, frakshon di MPB i frakshon Serberie tambe a manda un karta huntu ku kontenido similar, sosteniendo e desishon i e puntonan di UPB. Esaki ta indiká ku 5 di e 9 miembronan di Konseho Insular, ku ta mayoria, ta riba mes un liña tokante e maneho di Kolegio Ehekutivo den situashon aktual.

Advertisement