Den medio di e intrankilidat polítiko na Boneiru, gezaghèber a sali ku un deklarashon pa klarifiká e situashon gubernamental i su ròl den e proseso. Último lunanan a keda marka pa tenshon polítiko i petishonnan pa intervenshon den gobernashon lokal.

Segun gezaghèber, su posishon ta independiente i no ta representá ningun partido polítiko. E ta fungi komo presidente di  Kolegio Ehekutivo i tin komo tarea prinsipal pa vigilá bon gobernashon i integridat. Sin embargo, e ta mustra kla ku e no tin e responsabilidat pa forma un gobièrnu nobo, esaki ta den man di Konseho Insular i e partidonan polítiko.

E último desaroyo ta ku e gobièrnu aktual no ta konta ku un sosten mayoritario den Konseho insular mas. Konsekuentemente riba 31 di mart 2026, diputadonan a entregá nan retiro, loke a habri kaminda pa un reunion di urgensia riba 2 di aprel pa proponé diputadonan nobo. Na mes momento a bira konosí ku frakshonnan di UPB i MPB, huntu ku e miembro independiente Serberie, ta trahando riba formashon di un koalishon nobo.

Gezaghèber a enfatisá ku, segun e sistema di gobernashon, e Kolegio Ehekutivo ta keda na mando te ora ku Konseho Insular formal mente kita su konfiansa. Den e periodo di transishon, e ròl di gezaghèber ta inkluí fasilitá diálogo, pone tema riba agènda i promové kolaborashon, semper den e límitenan di lei.

Pa habitantenan, no tin kambio inmediato den servisio di gobièrnu. outoridatnan ta sigurá ku tareanan i servisio públiko ta sigui sin interupshon, i ku desishonnan urgente lo sigui wòrdu tuma. Lei ta sòru pa kontinuidat di gobernashon, meskos ku a pasa den situashonnan similar den pasado.

Konseho Insular lo reuní atrobe riba 2 di aprel 2026 pa proponé tres diputado nobo, ku e speransa di logra un transishon rápido pa un Kolegio Ehekutivo nobo.

Gezaghèber a sera ku un yamada pa stabilidat i kolaborashon, enfatisando ku, apesar di diferensianan polítiko, ta esensial pa gobernashon di Boneiru sigui funshoná den interes di tur su habitantenan.

Advertisement