Instituto Hudisial Hulanda Karibense (JICN) a inisiá un kampaña di komunikashon nobo titulá ‘Tras di e brel akí’. Ku e inisiativa aki, e instituto ke duna komunidat un bista mas profundo riba e trabou diario ku ta tuma lugá tras di e murayanan di prizòn.

Durante un rekorido resien ku por a mira den medianan di komunikashon lokal, direktor di JICN, Peter Hengeveld, huntu ku aktual direktor suplente, Anna Domacasse, a duna un splikashon amplio tokante meta di e kampaña. Nan a enfatisá ku e proseso pa prepará un detenido pa su regreso den komunidat no ta un asuntu ku ta kuminsá na final di su detenshon, sino un trabou ku ta start for di e promé dia ku e persona drenta e instituto.

Trabounan den JICN ta basá riba sinku pilá fundamental pa yuda e personanan detené prepará pa nan futuro:

• Seguridat i struktura den e bida diario;
• Guia profeshonal i personal;
• Trabou i desaroyo di abilidatnan nobo.

E kampaña ta boga tambe pa un aserkamentu kaminda tantu e detenido komo komunidat ta hunga un ròl. Di un banda, un regreso eksitoso ta eksigí responsabilidat propio di e persona mes, kende mester tuma e desishon pa skohe pa un mihó kaminda den bida. Di otro banda, komunidat tambe tin un ròl krusial. Segun JICN, e personanan aki ta bolbe serka nan famia, trabou i den nan mes ambiente, i p'esei ta importante pa sosiedat brinda nan e oportunidat pa nan por re-integrá i haña nan lugá bèk de forma positivo.

Ku ‘Tras di e brel akí’, JICN ke habri e portanan (visualmente) pa mustra un parti ku hopi biaha ta keda invisibel pa públiko. Dedikashon diario di e empleadonan, nan konosementu profeshonal, guia ku nan ta duna i e outentisidat di e preparashon pa un bida despues di prizòn.

Advertisement