Segun un komunikado di prensa risibí, un delegashon di Konseho Insular di Boneiru lo hasi un bishita di trabou na Sint Maarten i Hulanda for di 9 te ku 22 di yüni. E bishita tin komo meta interkambio di konosementu, fortalesé kooperashon den Reino i pone na atenshon diferente tema di importansia pa Boneiru i su habitantenan.

Segun e komunikado, durante nan estadia na Sint Maarten, e delegashon lo partisipá na Kumbre di BES huntu ku e Konsehonan Insular di Sint Eustatius i Saba. Tambe tin un konsulta bilateral planiá ku representantenan di Sint Eustatius, kaminda lo papia tokante retonan komun i posibilidatnan pa mas kooperashon den futuro. Durante e kumbre tambe lo tuma lugá e traspaso ofisial di presidensia di e Kumbre di BES di Boneiru pa Sint Eustatius.

Na Hulanda, e delegashon lo tene enkuentronan ku varios organisashon i institushon, bou di kua representantenan di Eerste Kamer, Tweede Kamer i Raad van State. E kòmbersashonnan lo enfoká, entre otro, riba tópikonan manera gobernashon, salubridat públiko, enseñansa, ambiente di biba i futuro desaroyo di Boneiru.

Konforme e komunikado, Konseho Insular lo kompartí regularmente informashon tokante e enkuentro, kòmbersashon i konosementunan optené durante e bishita di trabou, pa mantené e komunidat informá tokante progreso i resultadonan.

Advertisement