Un estudio nobo tokante kalidat di awa den Karibe Hulandes a revelá varios problema serio di kontaminashon den awanan kostal di Boneiru. E resultadonan, ku ta wordu deskribí komo alarmante, a move Bonaire Nature Platform (BNP) pa yama pa akshon urgente pa protehá salú públiko i ekosistema marino di Boneiru.

E estudio, realisá pa Wageningen Marine Research den kolaborashon ku STINAPA Bonaire, Reef Renewal Foundation Bonaire i varios partner lokal, ta konsiderá komo e evaluashon di kalidat di awa mas amplio ku a wòrdu hasi te awor den Karibe Hulandes.

Segun e investigashon, hopi di e kontaminashon ku ta afektá laman di Boneiru ta bini for di tera. Awa shushi, eroshon i otro tipo di polushon ta drenta laman regularmente, kousando un deterioro den kalidat di awa.

“Kalidat di awa ta relashoná serkanamente na hopi desafío ambiental di Boneiru,” BNP a deklará. Segun e organisashon, mehorashon di kalidat di awa lo kontribui na kòntròl di eroshon, maneho di awa, restorashon di naturalesa i resilensia kontra efektonan di kambio klimátiko.

Menasa pa refnan di koral

Un di e resultadonan mas preokupante ta ku e nivel di nutriente den laman regularmente ta mas haltu ku e límite konsiderá saludabel pa koralnan. E ekseso di nutriente ta stimulá kresementu di lima, ku por kubri koralnan i limitá nan kapasidat pa krese, sobrebibi i rekuperá.

Sientífikonan ta indiká ku e kombinashon di kontaminashon, temperaturanan di awa ku ta subi i eventonan ripití di blankeamentu di koral ta debilitá resilensia di refnan di Boneiru.

Refnan saludabel no solamente ta importante pa biodiversidat, pero tambe pa ekonomia lokal. Nan ta sostené sektor di peska, atraé turista i protehá kosta kontra eroshon i tormenta.

Kontaminashon kímiko den santu di laman

Ademas di nutriente, e estudio a identifiká nivel elevá di varios kontaminashon kímiko den santu. E supstansianan aki por akumulá den organismanan marino i eventualmente drenta den kadena alimentario. Esaki ta hasi ku investigadónan ta pidi mas estudio pa evaluá e posibel impakto riba salú humano i ambiente marino.

BNP ta hasi yamada pa tuma akshon

Basa riba e resultadonan, BNP ta insistí ku e Entidat Públiko Boneiru i Gobièrnu Hulandes tin ku tuma medidanan inmediato pa redusí e kontaminashon.

Entre e rekomendashonnan prinsipal ta:

• Mehora infrastruktura pa maneho di awa sushi i desecho;
• Intensifiká lucha kontra dùmpmentu ilegal;
• Kumpli ku legislashon ambiental eksistente;
• Tuma akshon kontra kontaminashon na e sitio di BOPEC i den e áreanan rond di Lagun;
• Establesé un programa permanente di monitoreo di kalidat di awa den Karibe Hulandes;
• Expande investigashon riba akumulashon di kontaminashon den piska i otro bida marino konsumibel.

Invershon den futuro di Boneiru

“E resultadonan ta papia pa nan mes,” BNP a deklará. “Kalidat di awa ta fundamental pa naturalesa, turismo, peskeria i bienestar di nos komunidat. E rapòrt mester sirbi komo un yamada pa akshon i un oportunidat pa invertí den futuro di Boneiru.”

BNP a indiká ku e organisashon ta kla pa sigui traha huntu ku STINAPA, Entidat Públiko Boneiru i Gobièrnu Hulandes pa desaroyá solushonnan basá riba siensia ku por mehorá kalidat di awa i fortalesé resilensia di ambiente natural di Boneiru.

Advertisement