Noel Janga a bolbe ekspresá su preokupashon pa e situashon di sushedat i falta di mantenshon den sitionan públiko i deportivo na Boneiru. Janga a señalá spesífikamente e área di Jato Baco, kaya Son Montuno i Jossy Boekhoudt Ballpark komo lugánan kaminda e situashon ta den un estado deplorabel.

Segun Janga, e falta di kuido den e áreanan akí no solamente ta afektá e bista di nos isla, sino tambe e posibilidat pa e komunidat, spesialmente hóbennan, hasi uso di e fasilidatnan akí na un manera safe i digno.

A base di su opservashonnan, Janga a duna un bista di e situashon na e siguiente puntonan:

• Jato Baco: E area akí, konosí pa su balor natural i uso re kreativo pero ta enfrentá problemanan ku akumulashon di sushi i falta di un struktura di mantenshon ku ta garantisá higiena pa bishitantenan. 
• Kaya Son Montuno, Kantidat di sushi ku siudadanonan a benta ilegalmente. Janga a indiká ku e situashon ta hopi tristu i ku e área mester di atenshon urgente pa prevení mas degradashon di medio ambiente i riesgo pa salú públiko.
• Jossy Boekhoudt Ballpark: Pa loke ta e kancha, Janga ta indiká ku e estado di e infrastruktura i mantenshon di e tereno no ta na e nivel deseá pa deportistanan. Un ballpark mester ta un lugá di orguyo pa e bario, pero den su estado aktual e ta representá un reto pa esnan ku ta hasi uso di dje.

Noel Janga ta argumentá ku e situashon den e sitionan akí no ta un problema isolá, sino un señal ku mester di un maneho mas fuerte i un plan di mantenshon ku ta struktural i no temporal. El a hasi un apelashon na departamentonan konserní pa bishitá e sitionan akí i tuma nota di e realidat ku siudadanonan ta enfrentá diariamente.

Janga a finalisá enfatisando ku mantenshon di sitionan públiko ta un responsabilidat kompartí, kaminda gobièrnu mester sòru pa e infrastruktura i e siudadano mester tin e konsenshi di no tira sushi, pa asina huntu logra un Boneiru limpi.

Advertisement