Sekretario di estado di Asuntunan Interno i Relashonnan den Reino, Eric van der Burg, tin intenshon di oumentá e kantidat di miembro di konseho insular i diputado na Boneiru, Sint Eustatius i Saba. E proposishon di lei, konosí komo e ‘Verhogingswet’, mester drenta na vigor promé ku e elekshonnan di konseho insular na mart 2027.

Ku e medidanan aki, gobièrnu di Hulanda ke fortifiká representashon demokrátiko riba e islanan. Segun Van der Burg, un kantidat mas altu di representante lo kontribuí na un mihó refleho di e komunidat den konseho insular. Tambe el a indiká ku e kantidat aktual di diputado no ta sufisiente pa atendé e kantidat di trabou ku tin.

E proposishon ta basa riba e kantidat di habitantenan, meskos ku e sistema ku ta usa na Hulanda Europeo. Esaki lo determiná kon hopi miembro di konseho insular i diputado kada isla lo tin den futuro.

Durante e último periodo, e sekretario di estado a sostené diferente kòmbersashon ku miembronan di konseho insular i kolegio ehekutivo di e tres islanan. For di esaki nan a sali un aktitut generalmente positivo pa e ekspanshon, aunke tambe a wòrdu señalá algun punto di atenshon, manera sosten pa griffier i konseho insular, i tambe gastunan relashoná ku alohamentu.

Van der Burg a indiká ku tin komprenshon pa e preokupashonnan aki i ku e lo sigui dialogá ku e gobièrnunan lokal pa buska solushonnan adekuá. Ademas, gobièrnu ta konsiderá kompensashon finansiero pa kubri e konsekuensianan di e proposishon.

Komo parti di e proseso, lo inisiá un programa di sosten pa aspirantenan polítiko via ProDemos i Netherlands Institute for Multiparty Democracy. E programa tin komo meta pa informá i motivá mas hende na Boneiru, Sint Eustatius i Saba pa bira polítikamente aktivo.

E proposishon di lei ya a wòrdu mandá riba 9 di aprel pa e komishon di relashonnan den Reino den Tweede Kamer, unda e lo wòrdu tratá den Parlamento Hulandes.

Advertisement