Ku e Kampionato Mundial di Futbòl 2026 kasi di ranka sali na Merka, Canada i Mexico, GGD Bonaire/ Salubridat Públiko ta spièrta komunidat pa bai prepará. Sea bo ta biahando pa e partidonan òf bo ta disfrutando lokalmente den bar, restorant òf eventonan grandi, e mensahe ta: gosa huntu ta mas plasentero si esaki ta tuma lugá na un manera seif.

Pa esnan ku tin suerte di biaha pa e paisnan anfitrion, Salubridat Públiko ta urgi pa traha un sita na tempu pa risibí konseho di biahe. Dependiendo di e destinashon, e tempu di bishita i situashon personal, bakunashon òf medidanan adishonal di salú por ta nesesario pa henter famia.

Un di e preokupashonnan di mas grandi pa biaheronan ta brotenan di sarampi ku tin aktualmente na Merka, Canada i Mexico. Sarampi ta un virus sumamente kontagioso ku ta plama fásil den sitionan drùk, manera aeropuerto, stadion i áreanan di fanátiko.

GGD Bonaire ta konsehá tur biahero pa kontrolá nan státus di bakunashon kontra sarampi (e angua di BMR) promé ku nan drenta avion. Na Boneiru, muchanan ta haña bakunashon akí via e Programa di Bakunashon di Reino, pero no tur adulto a yega di pas'é. Den kaso di duda, siudadanonan por tuma kontakto ku Salubridat Públiko òf ku nan dòkter di kas pa verifiká esaki.

Pa fanátikonan ku ta keda biba e pashon di futbòl for di Boneiru mes, GGD a kompartí algun tep fundamental pa e dianan largu di fiesta i deporte ku ta bini:

• Bebe ku midí: Interkambiá kada bibida alkohóliko ku un glas di awa, i kòrda kome bon promé ku sali;
• Seksualidat seif: Pensa riba siguridat i usa antikonseptivo. Si bo a kore riesgo pa un malesa transmití seksualmente (soa), bo por hasi un tèst grátis na e konsulta di salú seksual;
• Higiena di kuminda: Paga tinu unda bo ta kumpra kuminda i skohe pa sitionan ku ta prepará i warda esaki na un manera higiéniko;
• Salú promé: Keda kas si bo ta sinti bo malu òf si bo tin keho di salú, i laba bo mannan ku frekuensia.

E meta di Salubridat Públiko ta pa tur hende por gosa di futbòl sin ku esaki tin konsekuensianan negativo pa nan salú.

Advertisement