Papiamentu
Sindikato AFBW (Algemene Federatie van Bonairiaanse Werknemers) ta den pleno negosiashon pa garantisá mihó kondishon di trabou pa trahadónan na Boneiru. Presidente di e sindikato, Cherel Kwidama, a presentá un resúmen di lokual ku nan ta ehekutando, spesialmente riba tereno di bienestar i formashon laboral.
Segun Sr. Kwidama, AFBW ta full swing i na e momento akí tin shete Kontrato Kolektivo di Trabou (CAO) riba mesa pa negoshá pa diferente empresa i instansia.
E presidente a duna di konosé ku e kòmbersashonnan mas avansá na e momento akí ta tumando lugá ku e empresanan BWM (Bonaire Wegenbouw Maatschappij) i SELIBON. Ámbos negosiashon ta kanando den un bon direkshon pa por yega na un akuerdo pronto.
Fuera di e empresanan menshoná, AFBW ta dedikando hopi atenshon i forsa na e proseso pa yega na un kombenio pa e CAO di Zorg BES. Esaki ta un sektor krítiko riba nos isla, ya ku e ta salbaguardia e outoridat i e kondishonnan di e trahadónan den kuido médiko i sosial.
Kwidama a enfatisá ku e meta prinsipal di AFBW ta i lo keda pa krea un base sólido kaminda e trahadó boneriano no solamente ta haña un mihó salario, sino tambe e oportunidat pa sigui desaroyá su mes pa medio di formashon i kursonan ku ta preparé pa futuro.
Kargando komentarionan...