Hulanda Karibense lo haña un areglo di supsidio piloto pa sostené mantenshon i restorashon di bibiendanan monumental. For di sèptèmber 2026, doñonan na Boneiru, Sint Eustatius i Saba lo por apliká pa haña yudansa finansiero pa konservá nan propiedatnan históriko.

E areglo tin un presupuesto di un biaha so di 1,1 mion dòler i ta wòrdu manehá pa e Fondo Nashonal di Restorashon (Nationaal Restauratiefonds). Ku e piloto aki, gobièrnu ke haña eksperensia práktiko pa desaroyá un maneho duradero pa monumentonan den e region.

Minister di Enseñansa, Kultura i Siensia, Rianne Letschert, a indiká ku pa hopi doño di monumento na Hulanda Karibense ta difísil pa haña finansiamentu. Tambe Rianne Letschert a indika ku pa promé biaha tin un supsidio ku ta bai direktamente pa doñonan na e islanan. Esaki ta importante, pasobra monumentonan ta konektá hende ku nan historia i kultura i ta duna karakter na un komunidat.

Na Hulanda Europeo tabatin areglonan similar kaba, pero na Hulanda Karibense ainda no. E nesesidat pa esaki ta grandi, ya ku gastunan di mantenshon ta hopi altu pa motibu di ubikashon, skarsedat di materialnan spesialisá i gastunan di transporte.

E areglo ta wòrdu ehekutá pa e Servisio di Reino pa Herensia Kultural (RCE) i ta dirigí riba doñonan privá di bibiendanan monumental ku tin mester di mantenshon grandi òf restorashon. Pa bini na remarke, e gastunan mester ta mas haltu ku 25.000 dòler i e supsidio por subi te un máksimo di 100.000 dòler.

Tambe monumentonan di mas ku 50 aña ku ainda no tin státus protehá por apliká, si  nan tin balor históriko, artístiko òf kultural pa komunidat. E areglo pa aplikashon lo ta habri te ku 30 di novèmber 2026.

Advertisement