Tourism Corporation Bonaire a anunsiá ofisialmente e inisio di Boneiru su Luna Kultural pa luna di aprel 2026, ku komo tema ‘Na kaminda pa Dia di Rincon’. Durante henter luna, Boneiru lo pone énfasis riba su patrimonio, tradishonnan i e fuerte sentido di komunidat.

Segun TCB, e inisiativa tin komo meta pa duna tantu bishitantenan komo habitantenan un eksperensia outéntiko di kultura boneriano. Tur biahero internashonal ku ta yega Boneiru durante e periodo akí ta risibí un bon bini spesial ku ta reflehá hospitalidat i identidat lokal di nos isla.

Manera parti di e programa, tur djasabra lo tin presentashonnan bibu ku músika krioyo, kompañá pa bailadónan den trahe tradishonal folklóriko. E aktividatnan lo kontribuí na krea un ambiente vibrante i kolorido, kaminda kultura ta kobra bida pa tur esnan presente.

E Luna Kultural ta forma parti di e preparashonnan pa Dia di Rincon, un di e evento kultural mas importante i stimá na Boneiru. Durante e selebrashon, komunidat, músika i tradishon ta uní den un ekspreshon fuerte di identidat.

Direktor di TCB, Elesiër Angel, a bisa ku e iniciativa ta krea momentunan signifikativo pa tur hende eksperensiá Boneiru. “Nos ke ku tantu habitantenan komo bishitantenan por sinti i biba nos kultura for di e promé momento ku nan yega na isla,” el a deklará.

TCB ta enkurashá tur hende pa sigui e diferente aktividatnan durante luna di aprel pa medio di e wèpsait ofisial i e página di Facebook di Dia di Rincon. Ku e iniciativa akí, organisashon ta sigui promové e rikesa kultural di Boneiru i invitá tur hende pa eksperensiá su tradishonnan di serka.

Advertisement