Papiamentu
Durante promé reunion di Kolegio Ehekutivo (BC) riba 8 di aprel 2026, a stipulá ofisialmente repartishon di kartera di e tres diputadonan insular nobo. Ku esaki, gobièrnu a logra trese mas klaridat tokante e responsabilidatnan di kada miembro den maneho di asuntunan públiko.
Diputado Timoteo Silberie a duna di konosé ku durante e reunion, kada diputado a haña su kartera spesífiko, ku lo sirbi komo base pa nan trabou den e periodo benidero. Segun Silberie, e repartishon ta un paso importante pa garantisá un gobièrnu organisá i efisiente.
Diputado Silberie a indiká ku e ta asumí responsabilidat riba e parti sosial, un sektor amplio ku ta inkluí diferente área importante pa desaroyo di Bonaire. E énfasis lo keda riba mehorashon di bienestar sosial, sostenementu di komunidat i fortalesementu di servisionan pa habitantenan.
Kargando komentarionan...