Partido Union Patriótiko Boneriano (UPB) a presentá un programa nobo titulá "Boneiru bunita i bèrdè", un inisiativa ku tin komo meta pa trese un kambio fundamental i struktural den e forma kon ta mantené Boneiru su infrastruktura. E plan, presentá pa lider interino di UPB Jolinda Craane, ta enfoká struktural mente riba kuido general di paisahe di kaya i espasionan públiko direktamente den diferente bario den nos komunidat.

Segun splikashon ku Craane a duna, e aserkamentu nobo akí ta rekerí un gran esfuerso i koordinashon, ya ku intenshon ta pa kaba definitivamente ku tur e áreanan ku pa hopi tempu a keda neglishá. Pa logra esaki, e plan ta introdusí un sistema inovativo kaminda persona òf kompanianan lo bira permanentemente responsabel pa mantenshon di áreanan spesífiko. Na e manera akí, ta krea un struktura fiho pa asina garantisá un ambiente muchu mas limpi, un bista mas agradabel i un medio ambiente mas sigur pa tur habitante.

E próksimo trabounan pa ehekutá e programa akí ta kubri diferente aspekto di e paisahe urbano i natural. Esaki ta inkluí barimentu regular di kaminda prinsipal i sekundario, plantamentu di matanan permanente pa embeyesé barionan, i tambe trabou di kòrta i kita ramanan kologá ku ta stroba visibilidat. E último aki ta ser mirá komo un paso importante pa oumentá seguridat den tráfiko.

Pa medio di e plan "Boneiru bunita i bèrdè", UPB ta boga pa kuido di áreanan públiko stòp di ta un esfuerso temporal òf un kampaña di un biaha so. Lider interino Jolinda Craane a enfatisá ku e meta final ta pa mantenshon bira un responsabilidat diario i un struktura permanente, asina mandatarionan i komunidat huntu por elevá kalidat di bida i imágen general di Boneiru.

Advertisement